طل الصباح وتكتك العصفور
سهرنا وطولنا بنومتنا
شوفي الشفـق فرق علينا النور
والشمس منشورة عا خيمتنا
والكون غاشي والفلك مسحور
من سـقسقة ميات نبعتنا
يا اختي اسبقـيني ولفي المعدور
حا نكفي نكاش بورتنا
ليكي الجدايا هدهدوا المعبور
وخربوا مطاعيم كرمتنا
لك عيطيلك صوت للناطور
معزة أبو طنوس خربتـنا
ضهري يا خيي من التعب مكسور
ونقطة مي ما في بجرتنا
وبدي الحماية تزف للتنور
وانده بدربي بنت جارتنا
تا ترقّمعـنا الخبز يا منصور
راحت عياري كل خبزتنا
بشغـلنا بايت علينا كسـور
وحمضـت بتـكون عـجنتنا
يا اختي عـفـاكي روجي يا بدور
راح النهار والشمس غدرتنا
ومرشقيلك غـمر لـلقرقور
نحنا انسبقـنا يا خطيتنا
وإن ما قدرتي تبعتـيلي فطور
ودي لـطـيــفـة بـنـت خالـتـنـا
قديش يا اخـتي بعيشتي مقهور
غير شكل عن شباب ضيعتنا
بألف خير وعايشين بسرور
ومغـمـسـة بـالـدم لقمتنا
بتزعل كخيي وسماع مني صبور
شـو مـنعمل هيـك حالتنا
عرزالنا الأخضر بيـسوي قـصور
مناخو حلو من سنديانتنا
شلعات معـزي معمشـقا عصخور
ومنجيرة الراعي وعـنزتنا
ومغارة قـاديشـا أرزنا الـمشهـور
بيسووا الدني ومن عيشتك زعلان؟
غلطان حلوة كتير عيشتنا
Aucun commentaire:
Enregistrer un commentaire