dimanche 8 avril 2012

شهرزاد - يا ناسيني







يا ناسيني و أنا عمري ما انسى حبك 
تهجرني سنة ... يا قساوة قلبك
سنه و أنا و لا على بالك ... 
و لا مريت في خيالك
ليه كده ليه .. ذنبي أنا إيه ... قوللي عليه 
يا ناسيني
دانا العمر و أنتَ الحياة 
و أنا الفجر و أنتَ ضياه
و أنا إيه أكون من غيرك 
و أنت حارمني نورك
فجر حزين .. عمر سجين ... و أشكي لمين 
يا ناسيني
دا أنا الورد و أنتَ ربيعه 
و أنا الود و أزاي تبيعه
ليه دبلت شبابي ... ليه طولت عذابي
من أساك ... مين نساك ... فين ألقاك 
يا ناسيني
دانا الحب و أنتَ لهيبه
و أنا القلب و أنتَ حبيبه
كده يكويني لهيبك ... كده تغدر بحبيبك
ياما بكيت ... ياما شكيت .. 
يا ناسيني 

كلمات : مأمون الشناوى 

الحان: رياض السنباطى 








من مفارقات هذه الاغنية(تحكى شهرزاد وتقول فى فرح نجل محمد عبده صالح كان جميع اهل الفن مدعوون فى هذه الفرح فجاءت ام كلثوم ووجدت شهرزاد فنادت لها واجلستها بجانبها وقالت لها انا عايزة اسمع اغنيتى فارتعبت شهرزاد وقالت ازاى اغنى قدامك ياست؟
فقالت لها ام كلثوم انا نفسى اسمع اغنية ياناسينى وهنا جاءت الفرقة وغنت شهرزاد الاغنية وابدعت وام كلثوم كانت مندمجة بطريقة عجيبة وكانت تقول لشهر زاد الله الله عيدى تانى عيدى تانى الى ان انتهت منها
تحليل أغنية ( ياناسينى ) لشهرزاد
أغنية ياناسينى ... ألحان العملاق ( رياض السنباطى ) .. وغناء العظيمة ( شهرزاد ) ..

يمكننا القول بأن ( ياناسينى ) تعتبر من تحديات رياض السنباطى .. تحدى لنفسه قبل أن يكون تحدى لأم كلثوم .. 

مقدمة موسيقية طويلة جداً .. أبدع فيها السنباطى .. ووظف كل إمكانياته .. الموسيقى تبدأ من مقام ( الكرد ) وكذلك الأغنية .. 
ولم يترك السنباطى مقاماً أو سلماً موسيقياً .. لم يترك تكنيك ( كروماتيك ، عُربه ، تريمولى ) إلا وإستخدمه فى هذه الأغنية .. وعلى رأى الأستاذ الشريعى ( عنقود مقامات ) .. 
كذلك الإيقاعات .. مزج بين الإيقاعات الشرقية والغربية ببراعة .. فنجد الواحدة الكبيرة بجوار الفوكس .. والسماعى الدارج بجوار الرومبا .. ولكننا أمام موسيقى شرقية بديعة .. 

ولا يمكن الحديث عن ( ياناسينى ) دون الحديث عن الدور الأساسى الذى قام به ( العود ) .. وجدير بالذكر أن السنباطى نفسه هو من قام بالعزف على العود أثناء تسجيل الأغنية .. أستاذ عود كبير .. إسمعوا التريمولى أثناء العزف ( صد ورد الريشة على الأوتار ) بطريقة سريعة .. إسمعوا الحوار بين العود وباقى الفرقة .. إعجاز .. 

شهرزاد .. مطربة بحق وحقيقى .. شوفوا الأداء .. شوفوا ترجمة المشاعر أثناء الغناء .. إسمعوها وهى تقول ( سنه وأنا ولا على بالك ) شوفوا الدلع .. شوفوا الحنية .. 

إسمعوها لما تقول ( ولا مريت فى خيالك ) عكست المسألة .. كبرياء ورفض لما يفعله الحبيب .. 

ياجماعة .. لو إتكلمنا على ياناسينى .. مش حانخلص النهاردة .. لكنى مش قادر أسكت .. مش عارف أقف .. 

إسمعوا والنبى أول كوبليه وهى بتقول ( دنا العمر وإنت الحياة ... وأنا الفجر وإنت ضياه ) 

شوفوا التعبير عن الكلمات .. كل كلمة بتعبير وشكل مختلف .. إسمعوا كلمة ( ضياه ) شوفوا بتقولها إزاى .. 

وشوفوا كمان لما نقلت للشطرة التانية ( وأنا إيه أكون من غيرك ... وإنت حارمنى نورك ) 

شوفوا الفرحة فى صوتها .. صوتها بيرقص مع الإيقاع .. 

المهم .. إسمعوا الأغنية وإدعوا للسنباطى بالرحمة ..





2 commentaires:

  1. اللة علي الاغنية الجميلة والجمهور منفعل والفرقة المكوسيقية اروعة اما العظيمة شفيقة محمد السيد وهى شهر زاد رحمها اللة اعطتنا جرعة كبيرة من الالقاء وكلامها كلة وجدان وصل قلوبنا

    RépondreSupprimer
  2. شهرزاد فنانة من جيل العمالقه وعصر النهضة الفنية في مصر واغنيتها يانسيني ابدعت فيها حتى الخيال

    RépondreSupprimer